topic!

На 34mag.net стартуе новы топік – ZINES. Усё, што ты хацеў ведаць пра сучасны самвыдат, але не было ў каго спытацца.

Зін (англ. Zine) – скарачэнне ад magazine (часопіс). Менавіта гэтым словам называюць выданні, што друкуюцца невялікім накладам, а працэс стварэння і распаўсюду якіх з’яўляецца цалкам незалежным і некамерцыйным.

Сваім узнікненнем зіны абавязаныя прышэсцю панк-культуры з ейнай DIY-этыкай і распаўсюду ксераксаў – а значыць, і таннага сродку тыражавання. І хаця Марцін Лютэр, Кастусь Каліноўскі, савецкія дысідэнты і амерыканскія фантасты 20-х гг. таксама друкавалі свае творы самастойна, паміж імі і зінаробамі ёсць прынцыповае адрозненне: у гэтых ольдскульных самвыдатчыкаў проста не было іншага выйсця, у той час як для стваральнікаў зінаў падпольнае існванне – цалкам свядомы выбар.

Колькасць зінаў, якая выйшла з канца 70-х, не вядомая, пэўна нікому: ад маленькіх рукапісных зінаў да папулярных выданняў у глянцавай вокладцы, зіны музычныя, палітычныя, асабістыя, кулінарныя, што выдаюцца ад Казахстана да Уругвая. 

Але ад столькіх людзей, якія знаёмыя з зінамі больш-менш даўно, даводзілася чуць: «Я не чытаю зіны. Усё, што там можна было прачытаць, я ўжо даўно прачытаў(ла)». І ў нейкім сэнсе яны маюць рацыю: чарговы артыкул пра карысць вегетарыянства ці чаму целявізар і фашысты гэта кепска, стандартны набор пытанняў для інтэрв’ю з гуртом – не надта цікавейшыя за сотую версію тлумачэння таго, што такое зін. 

Але людзі, якія працуюць над тэмай ZINES для 34mag.net, задужа любяць зіны, каб пагадзіцца з тым, што нічога цікавага пра іх ужо і не скажаш. Нас цікавяць зіны не столькі як феномен, па канцэптуальных, тэхнічных і гістарычных асаблівасцях якога можна абараніць дысер; не як «новая» моладзевая фіча, якой можна забіць газетную паласу; не як прадукт, які можна прадаць; не як арт-аб'ект, які можна змясьціць у галерэйную прастору і прыставіць да яго эксперта-крытыка-куратара. Што нас натхняе, дык гэта думкі, адлюстраваныя на паперы, і, канешне, людзі – якія робяць і чытаюць зіны, людзі, якія арганізоўваюць і наведваюць бібліятэкі, інфашопы, сустракаюцца на зін-фестывалях і пішуць лісты адно аднаму; моманты, калі дастаеш з паштовай скрынкі канверт аднекуль здалёк ці вяртаешся ўначы з канцэрту з новым зінам у заплечніку...

Глядзі сёння:

Як зрабіць свой “выразаў-наклеіў” зін.

Комікс ад marla zinger

У бліжэйшыя тыдні чытай, глядзі і слухай у тэме ZINES:

- нашы ўлюбёныя зіны;

- самвыдатаўскія мастакі;

- зіны ў кіно, кіно пра зіны;

- куды падацца самвыдатчыку: агляд зін-івэнтаў;

- беларускія героі зін-фронту;

etc.